Калі я падкінуць зьбіраўся ў агонь Ахапак пажоўклага лісьця ляшчыны, Апаў лузанец залаты на далонь, – I раптам мяне ахінулі ўспаміны. Калісьці асеньняю гэткай парой Сказала дзяўчына: – Калі адгадаеш, Ці ў левай, ці ў правай арэхі трымаю, Тады можаш сватацца, буду тваёй... Ці ў левай, ці ў правай?.. Я сьціснуў руку: – Адкрый!.. – Лузанцы пакаціліся ў верас. – Шукай іх! – шапнула і па сасьняку Ўцякла жартаўніца, якой я паверыў. I хоць тыя дні сёньня скрыліся ўдаль, Але лузанцы я люблю, як калісьці, I з жоўтым ахапкам асеньняга лісьця Заўсёды ў агонь мне іх кідаць шкада.
1957
|
|